CEBU – Nagpaabut na ug tabang ang Cebu Provincial Government ubus sa kamanduan ni Governor Gwendolyn Garcia, ingun man ang DSWD 7, sa mga ginikanan sa mga namatay nga estudyante sa aksidente nga nahitabu sa Sitio Lingatong, Barangay Upper Becerril, lungsod sa Boljoon, Cebu.
Kini ang gikumpirmar ni Agnes Mendaro, ang PTA President lukup probinsiya sa Sugbo.
Gipadayag ni Mendaro nga tubagon sa DepEd Region VII ang tanang galastuhan gikan sa medical assistance hangtud na sa pagpalubung sa mga namatay.
Samtang, nagsagol nga kasakit ug kalagut ang gibati sa mga biktima ilabi na sa ilahang nasayran nga ubus sa impluwensiya sa ilimnong makahubug ang drayber nga si Danilo Nieri.
Gisaysay usab ni Aga Oliveros, 11 anyus, usa sa mga survivor nga hilabihan ka kusug ang dagan sa driver hinungdan nga nalimbuwad kini sa dihang paliko na ang truck sa dulhugon nga dapit.
Matud pa nga dali kini mi-ambak sa dihang nabantayan ang nagsingabut nga disgrasya ug nakita na lang niini ang iyahang mga kauban nga napi-it sa truck ug ang uban ang nalagput ug napisat ang ulo hinungdan nga adunay mga nagkatag nga utok sa kadalanan.
Subay niini, gisiguro ni PSWDO head Wilson Ramos nga magpadala ug mga social worker sa lungsod arun nga mu atiman sa mga survivor, ingun man sa mga ginikanan alang sa ilahang ‘psycho-social needs’.
Nasayran nga luwas na ang drayber sa truck ug anaa sa kustodiya sa kapulisan arun na usab nga malikay sa mga ginikanan nga hilabihan kalagut sa nahitabu.
Kahinumduman nga kaganihang buntag, Hulyo 19, sa dihang nawagtangan ug break hinungdan sa pagka-disgrasya sa mini dump truck nga adunay karga nga mga tinun-an ug pipila ka mga ginikanan gikan sa Nangka Elementary School ug ihatud unta sa lungsod alang sa ipahigayun nga district meet.
Giila ang mga namatay nga sila si Jerome Niere, 11 anyus, Mary Ann Filipino, 12 anyus, Janna Delos Santos, 12 anyus, Clint Isidore Dugang, 10 anyus, Jefferson Jorpo, 11 anyus, Alexander Villanueva, 20 anyus, Victoria Gorozon, 40 anyus, Mark Loyd Mosqueda, 12 anyus, ug Riza Mae Vinan, 10 anyus.
