Nakatala ang probinsya sa Sugbo og 1,580 ka kaso sa dengue gikan sa katapusang semana sa Setyembre hangtod sa ikatulong semana sa Oktubre 2026, sumala sa Cebu Provincial Health Office (PHO).
Matod ni Dr. Sheila Faciol sa PHO, ang probinsya nakatala og 296 ka kaso sa semana sa Setyembre 21 hangtod 27, diin misaka kini ngadto sa 390 ka kaso gikan sa Setyembre 28 hangtod Oktubre 4, ug 451 ka kaso gikan sa Oktubre 5 hangtod 11. Ingon man nga miubos og gamay ang gidaghanon ngadto sa 443 gikan sa Oktubre 12 hangtod 18.
Ang probinsya nakatala usab og duha ka kamatayon nga may kalabotan sa dengue matag semana sulod niining maong panahon.
Aron mapugngan ang dugang nga mga impeksyon, ang PHO nagpahigayon og mga operasyon sa pag-fogging sa nagkalain-laing mga lungsod, nanghatag og mga kemikal aron batokan ang mga lamok, ug naghatag og mga NS1 dengue test kit.
Nagpabilin usab ang mga “fast lane” alang sa dengue diha sa mga ospital aron mapadali ang pagsusi ug pagtambal sa mga pasyente nga gidudahang adunay dengue.
