PROVINCE OF CEBU-Gipalapdan sa Cebu Provincial Hospital sa Balamban (CPH Balamban) ang ilang serbisyo sa hemodialysis pinaagi sa pagdugang og kinse ka bag-ong dialysis machines, dugang sa napulo ka working units niini.
Ang giingon nga pagpalapad, usa ka kolaborasyon tali sa Kapitolyo ug pribadong kompanya nga Medtronix Medical Supplies and Equipment, diin nagdugang sa kapasidad sa tambalanan ngadto sa 25 ka hemodialysis units, ang kinadak-ang hemodialysis center hangtod karon sa mga ospital nga gipadagan sa Kapitolyo.
Gipasiugda ni Dr. Olivia Dandan, ang hepe sa CPH Balamban hospital nga ang pagpalapad nagtimaan sa usa ka mahinungdanong milestone sa pasalig sa paghatag og accessible nga serbisyo sa healthcare sa nahisgutang komunidad, ilabi na sa mga nakigbatok sa sakit nga kidney.
Nasayran sa maong seremonyas nga gawas kang Gov. Gwen Garcia, anaa usab ang presenya nila ni third district Congressman Pablo John Garcia, Balamban Mayor Ace Binghay, Balamban hospital chief Dr. Olivia Dandan, DILG-7 regional head Leocadio Trovela, DILG-Cebu chief Ian Kenneth Lucero, ug Jona Navarro.
Uban sa mga bag-ong hemodialysis units sa Balamban, gipasigarbo usab sa Kapitolyo ang kinatibuk-ang 77 ka working dialysis machines nga mikaylap sa laing upat ka ospital, nga mao ang CPH Carcar, CPH Danao, Bantayan District Hospital, ug Ricardo L. Maningo Memorial Hospital sa San Francisco, Camotes.
