CEBU PROVINCE-Gihangop ni Gobernador Gwen Garcia ang pagsaka sa Department of Health sa Cebu Provincial Hospital sa Balamban (CPH Balamban) ning kasadpang bahin sa lalawigan sa Sugbo ngadto sa Level 2 status.
Kini mao ang labing una sa mga hospital nga gidumala sa Kapitolyo nga na-accredit sa DOH.
Gipirmahan ni DOH 7 Director Dr. Jaime Bernadas, ang pormal nga turnover sa “License to Operate a Level 2 Hospital” nga gihimo sa CPH Balamban niadtong adlaw sa Martes, Hunyo 18, 2024.
Gidawat kini nila Cebu Provincial Governor Gwendolyn Garcia, Cebu 3rd District Congressman Pablo John Garcia, ug pangulo sa ospital nga si Dr. Olivia Dandan nga gikan kang Mr. Filman Brubo sa Local Health Support Division sa DOH Central Visayas.
Midugang ang gobernadora nga ang laing tulo ka mga provincial hospital nga gidumala sa kapitolyo nga mao ang Cebu Provincial Hospital sa dakbayan sa Carcar, Danao, ug Bogo kay anaa na sa proseso sa pagtuman sa ilang Level 2 accreditation.
Kahinumduman nga ang Bantayan District Hospital gipasaka na ngadto sa Level 1 niadtong Abril ning kasamtangang tuig, samtang ang ubang mga district hospital sa probinsiya ilabi na ang Ricardo L. Maningo Memorial Hospital sa San Francisco, Camotes nagpadulong na usab sa pagka Level 1 Hospital.
Sa samang kalihokan, gipadayag sa Kapitolyo ang gipalapdan nga hemodialysis center sa naasoy nga tambalanan sa Balamban nga nakadawat kini ug 15 ka dugang nga hemodialysis machines sa ibabaw sa 10 ka working units niini nga nisaka sa 25 ang kinatibuk-ang makina.
Kini mao ang pinakadakong hemodialysis center sa tanang dialysis centers nga gipadagan sa Kapitolyo.
