CENTRAL VISAYAS- Nangayo og daliang dayalogo ang usa ka grupo sa mga transport cooperatives sa Sugbo sa Land Transportation Franchising and Regulatory Board (LTFRB) ug Land Transportation Office (LTO) aron matubag ang nagkadakong kabalaka sa isyu sa overloading sa mga public utility vehicles (PUVs).
Sa interbyu sa Bombo Radyo, si Ellen Maghanoy, presidente sa Federation of Cebu Transport Cooperatives, miingon nga kinahanglan ang kooperasyon tali sa mga ahensya ug transport groups aron masulbad ang problema.
Gihatagan niya og gibug-aton nga kasagaran ra mahitabo ang overloading panahon sa peak hours buntag ug hapon tungod kay naningkamot ang mga drayber nga mamawi sa ilang biyahe.
Samtang gitugot lamang karon nga lima ka standing passengers ang sakay, gisuportahan ni Maghanoy ang posibilidad nga patas-an kini ngadto sa napulo, ilabi na kung luag pa ang espasyo ug komportable pa ang mga pasahero.
Sa pikas bahin, si LTFRB Region 7 Director Eduardo Montealto Jr. nagpasabot nga abli ang ilang buhatan sa pakigpulong sa transport groups aron hisgutan ang guidelines ug posibleng adjustments. Apan, klaro niyang gisulti nga ang seguridad sa publiko mao gihapon ang prayoridad.
Tungod niini, mas ipatuman pa ang “Anti-Sardinas Policy” tungod kay daghang modern PUJs ang masakpan nga naglapas sa allowed capacity.
Gisubli ni Montealto ang pahimangno nga ang mga drayber ug operator kinahanglan magpabiling motan-aw sa serbisyong publiko ug kaluwasan sa mga pasahero isip unang obligasyon.
Ang kasamtangang limitasyon sa kapasidad sa mga tradisyonal ug modernong jeepney nagasakop gikan sa 12 hangtod 32 ka pasahero, depende sa disenyo. Gitugotan lamang nga adunay hangtod lima ka standing passengers subay sa regulasyon.
