Nagproponer og budget ang Department of Public Works and Highways (DPWH) nga mokabat sa gibana-banang P1.1 bilyones alang sa pagtukod og lima ka bag-ong mga pasilidad nga water-impounding structures sa nagkalain-laing lugar sa Cebu sa tuig 2027.
Matod ni DPWH Secretary Banoy Lopez, duha sa mga gisugyot nga pasilidad ang tukoron sa Barangay Cotcot, samtang ang laing tulo giplano nga ibutang daplin sa Suba sa Butuanon, sa Bulacao, ug daplin sa Suba sa Mananga.
Gibutyag ni Lopez nga gihatagan ni Presidente Ferdinand Marcos Jr. og prayoridad ang maong giproponer nga pondo human sa kadaot nga dala sa Bagyong Tino.
Gilauman usab nga sugdan sa DPWH ang proseso sa procurement alang sa mga proyekto sa sunod tuig, ug ang konstruksyon magsugod human mahuman ang maong proseso.
Ang mga giproponer nga proyektong imprastraktura gitumong aron maminusan ang pagbaha sa mga dapit sa Cebu nga dali maapektuhan niini, pinaagi sa pagsikop ug temporaryong pagtipig sa sobra nga tubig-ulan, ilabi na panahon sa kusog nga ulan ug mga bagyo.
Ingon man nga kabahin ang nahisgutang kantidad sa gisugyot nga P17 bilyones nga pondo nga naglangkob sa kinatibuk-ang mga proyekto sa nasod alang sa flood-control projects sa 2027.
