CEBU CITY-Gipangandoy ni Jeency Agujar Pilapil, ang Top 1 sa Medical Technologist Licensure Examination 2024, nga malakip sa top hinungdan nga iyaha kining gi-ampoan.
Sa pakighinabi sa Bombo Radyo Cebu ni Pilapil, gibutyag niini nga sukad pagka-elementary hangtud sa College kay wala gayud kini malakip sa mga honor students apan padayon niini nga gipaabot ang iyahang panahon.
Matud pa, gipugngan pa kini sa iyahang ginikanan nga magtuon human sa iyahang graduation gumikan kay giingong wala na kini angayan pang pamatud-an, apan pursigido si Pilapil nga malakip sa top list sa naasoy nga eksaminasyon.
Giangkon ni Pilapil nga naglisod gayud kini sa gipahigayon nga exam, ug gani, daghan sa iyahang mga tubag kay ‘guess’ na lang niini.
Samtang, gipaambit usab niini nga iyahang Lolo ug Lola ang nahimo niyang inspirasyon nga makapasar ug mo top sa exam.
Sa pagkakarun, gitataw ni Pilapil nga wala pa kini plano nga manarbaho, inay, mopadayon sa iyahang pag-eskwela sa medical school.
