Gi-akreditar ang pinakabag-o nga abogado nga Pilipino aron morepresentar sa mga kliyente sa International Criminal Court (ICC) mao ang Sugbuanong si Atty. Rameses Victorius Gatchalian Villagonzalo.
Si Atty. Villagonzalo ang ikaunom nga Pilipino ug ang unang Sugbuanon nga nagserbisyo isip abogado sa ICC.
Nailhan siya sa pagdumala sa mga bangis nga krimen sama sa iyang pagdepensa kang Bella Ruby Santos kinsa giakusahan sa kidnapping with homicide ug sa ulahi gi-abswelto pinaagi sa demurrer to evidence niadtong 2014.
Si Atty. Villagonzalo migraduwar sa University of Southern Philippines nga adunay degree sa abogasya. Ang iyang pangunang natad sa abogasya mao ang mga balaod kriminal ug penal ug ikaduha sa mga balaod sa kabtangan ug kaminyoon.
Miingon siya nga wala siyay masulti ug nalipay pag-ayo sa pagkadawat sa kumpirmasyon sa ICC isip bag-ong abogado niadtong Huwebes, Nobyembre 27.
Base sa criteria sa ICC alang sa pagsulod sa listahan sa mga abogado, ang iyang abilidad ug kahanas sa internasyonal o kriminal nga balaod ug pamaagi kinahanglan nga mapamatud-an.
Kinahanglan usab nga adunay labing menos 10 ka tuig nga kasinatian sa mga prosesong kriminal isip usa ka huwes, piskal, abogado o sa laing susamang kapasidad.
Kinahanglan usab nga adunay kahibalo ug kahanas sa usa sa duha ka pinulongan nga gigamit sa korte, nga mao ang Ingles o Pranses.
