CEBU CITY — Andam kanunay ang han-ay sa kasundalohan kung ugaling ideklarar ni Presidente Rodrigo Duterte ang Martial Law sa lalawigan sa Negros Oriental.
Kini ang gisiguro ni Lieutenant General Noel Clement, Central Command – Central Visayas Chief atol sa pagpakighinabi sa Bombo Radyo Cebu.
Gibutyag ni Lt Gen. Clement nga usa lang ang tuyu sa kasundalohan, ingun man sa kapulisan mao ang kahapsay ug kalinaw lukup nasud.
Matud pa nga gikasabut na nila ang pwersa sa Philippine National Police sa pag-address sa problema sa Negros Oriental.
Apan sigon ni Lt Gen. Clement nga dili mahimung sila lang ang makigbatuk sa problema sa New People’s Army (NPA) hayan gikinahanglan ang pagtinabangay sa tanan kung diin maglakip na niini ang Local Government Unit, kapari-an, ingun man ang katawhan mismo sa nahisgutang probinsiya.
Giingung apektadu ang tanan kung walay pagtinabangay nga ilahang pagabuhatun.
Subay niini, gipahibalu sa CENTCOM chief nga gipaningkamutan nila karun nga makab-ut ang mga stakeholders arun nga ipasabut kanila ang tinud-anay nga nahitabu sa ilahang lugar.
Nagkanayun si Lt. Gen. Clement nga klaru ug tataw nga usa ka propaganda batuk kanila ang gibuhat sa rebeldeng grupo hinungdan nga nagpadayun ang ilahang pagpanghadluk sa katawhan pinaagi sa sunud-sunud nga pagpatay sa Negros Oriental.
Hinu-un, giklaru ni Lt Gen. Clement nga ‘manageable’ lang ang sitwasyon sa nahisgutang probinsya ug gikinahanglan lang gayud ang ‘collective’ o pagkahi-usa sa tanan arun nga mapakgang ang mga rebelde nga NPA.
