CENTRAL VISAYAS-Malinawon ang Semana Santa sa tibuok Central Visayas nga walay gikatahong krimen nga may kalambigitan sa selebrasyon.
Kini ang gibutyag sa Police Regional Office Central Visayas (PRO 7) Director Brigadier General Antony Aberin, nga nagkanayung kini gumikan sa malampusong security deployment plans nga ilang gipatuman.
Nagtuo si Aberin nga nakatabang usab ang pagtukod sa police assistance desk ug ang nagpadayong kampanya batok sa kriminalidad ingon man ang pagbutang og safety tips sa social media.
Matod niya, hugot niyang gimonitor ang deployment sa mga personnel sa mga lugar nga tapok sa mga tawo atol sa taas nga bakasyon ug kalihokan sa Simbahang Katoliko.
Gitino usab ni Police Colonel Ireneo Dalogdog, ang City Director sa Cebu City Police Office, nga “generally peaceful and manageable” ang sitwasyon sa dakbayan.
