Hangyoon ni Lapu-Lapu City Mayor Junard “Ahong” Chan ang Cebu Provincial Government nga dili na lang putlon ang kontrata sa ngadto sa Manila Water Consortium, Inc.
Kini ang reaksyon sa mayor human nakahukom si Cebu Governor Gwendolyn Garcia nga i-revoke ang kontrata tali sa Capitol ug sa maong Manila Water.
Matud ni Chan nga maglisud sila sa pagpangita og laing tinubdan sa tubig ilabi na nga moabot sa 60,000 cubic meters sa tubig ang konsumo sa mga Oponganon matag adlaw.
Nasayran nga anaa lang sa 35,000 cubic meters sa tubig ang gihatag sa Metropolitan Cebu Water District sa maong dakbayan matag adlaw.
Kuwang lang alang ni Chan aron masustiner ang supply sa tubig sa iyang mga konstitwente.
Dugang pa ni Chan nga apektado ang mga konsumidor, ingon man ang ekonomiya sa dakbayan kung mahunong man ang pakig-alayon sa Provincial Government ug sa Manila Water Consortium.
Kung mahimo, hangyoon ni Chan si Gov. Garcia aron pugngan ang pag-hunong sa kontrata ngadto sa Manila Water.
Water desalination
Paninguhaon sa Lapu-Lapu City Government nga mahimong “independent” sila sa pagbaton og tinubdan pinaagi sa water desalination.
Matud ni Mayor Chan nga kini ang mas maayong solusyon aron maibanan ang kakuwang sa suplay sa tubig sa mga Oponganon.
Naningkamot si Chan nga makakita og laing source sa tubig aron ma-sustain pa ang suplay niini.
Gihimug-atan sa mayor nga importante ang water desalination alang sa ilang komunidad bisan pa man og nagkinahanglan og panahon aron matukuran kini.
