CEBU CITY- Wala’y nakit-an ang Cebu City Health Department (CHD) nga igo ug hinungdanong ebidensya nga naglambigit sa bisan unsang establisemento sa mga lugar sa Colon ug Carbon sa alegasyon nga ang hugaw sa tawo gilabay ngadto sa mga pampublikong drainage system.
Kini sumala sa opisyal nga report nga gisumite human sa usa ka multi-agency nga imbestigasyon nga gimando sa City Hall.
Ang findings migawas kapin sa duha ka semana human gimando ni Mayor Nestor Archival ang mga opisina sa siyudad sa pag-imbestigar sa usa ka viral nga reklamo sa social media nga nag-alegar nga ang pipila ka mga trabahante sa downtown Cebu napugos sa pag-ihi sa mga sudlanan nga sa ulahi gibubo ngadto sa mga kanal sa daplin sa dalan tungod sa kakulang sa access sa mga kasilyas.
Sa report sa imbestigasyon nga gipetsahan niadtong Abril 28, giingon sa CHD nga wala’y nakitang hinungdanong findings ang mga inspeksyon nga gihimo sa mga lugar sa Colon ug Carbon nga direktang naglambigit sa giingong insidente sa paglabay og hugaw ngadto sa drainage system.
Nagpahigayon ang buhatan og sunod-sunod nga inspeksyon human sa pagkaylap sa mga kabalaka sa social media bahin sa usa ka indibidwal nga giingong naglabay og likidong basura nga gituohang hugaw sa tawo ngadto sa usa ka pampublikong drainage system.
Sumala sa report, ang unang inspeksyon gihimo niadtong Abril 27 sa Colon Street, diin ang mga personnel sa Health Department mibisita sa mga food ug non-food establishments aron masuta ang posibleng gigikanan sa giingong dili hustong paglabay sa basura.
Nasuta sa mga inspektor nga ang mga kasilyas ug drainage system sa mga establisementong ilang gisusi naglihok og husto. Ang bugtong balik-balik nga gikabalak-an sa mga negosyante mao ang problema sa pagbaha panahon sa ting-ulan.
Atol sa maong inspeksyon, nakabantay ug nakadokumento ang team og usa ka indibidwal nga nangihi daplin sa Colon Street duol sa usa ka drainage area. Sumala sa mga imbestigador, ang maong tawo daw adunay mental health condition.
Mibutyag usab ang CHD nga nagpahigayon sila og follow-up inspection sa misunod nga adlaw human matumbok sa mga imbestigador ang lokasyon nga gipakita sa viral nga reklamo.
Apan, ang tag-iya sa establisemento nga nalambigit sa reklamo sa sinugdanan midumili sa pagsulod sa mga inspektor tungod kay ang mission order nga ilang gipresentar wala magtino sa eksaktong lugar diin nahitabo ang giingong insidente.
Bisan pa niini, giingon sa report nga giangkon sa tag-iya nga adunay tubig nga gipagawas gikan sa establisemento. Hinuon, iyang giklaro nga kini gikan sa air-conditioning unit ug wastewater nga namugna gikan sa mga kalihokan sa paglimpyo sa salog, ug dili gikan sa hugaw sa tawo.
