CENTRAL VISAYAS-Gidayeg ni Chief of Staff sa Armed Forces of the Philippines, General Romeo Brawner Jr. ang Visayas Command, nga usa sa adunay labing dako nga kontribusyon sa mga kampanya sa AFP.
Gihimo ang maong pagdayeg atol sa pagbisita niini sa Headquarters sa VISCOM sa Camp Lapulapu dakbayan sa Sugbo sa mga kalampusan sa miaging tuig ug sa duha ka buwan ning tuiga.
Gani sa maong panagtigom, gipresentar ang mahinungdanong internal nga seguridad nga nahimo sa VISCOM diin gilangkuban sa malampuson nga pagbungkag sa unom ka NPA Guerilla Front sa miaging tuig ug ang paghawan sa tanang NPA-infested nga komunidad sa tibuok rehiyon sa Visayas.
Ingon man nga dako ang kalipay ni Lieutenant General Arevalo sa nahimong pamahayag sa CSAFP nga ang ilang paningkamot ug mga sakripisyo naila sa Chief of Staff.
Dugang pa nga mipasalig ang mga troopa nga dili mapakyas nga mopadayon uban sa mga padayon usab nga suporta sa mga katawhan ug sa ubang kaubanan nga ahensya nga malab-ot ang makiangayon ug malungtarong kalinaw ug malungtarong kalamboan sa tibuok Visayas nga rehiyon.
Atol usab sa pakighinabi sa Bombo Radyo Cebu News Team kang Lt. Col. Israel Galorio, ang tigpamaba sa Visayas Command nga dako ang iyang pasalamat sa komunidad, sa lokal nga kagamhanan ingon man sa mga media nga usa sa mga mipadayag sa mga impormasyon ngadto sa katawhan, gani ang nakuhang pasidungog nila dili lang sa ilaha gumikan alang kini sa tibuok Central Visayas.
