Misupak ang Childrens Legal Bureau (CLB) sa pagdili sa paggamit sa social media sa mga menor de edad ubos sa 18 anyos, subay sa lakang nga gipasar sa Senado.
Matud ni Atty. Noemi Truya-Abarientos, executive director sa CLB, ang total ban usa ka shortcut nga pamaagi sa pagsulbad sa mga problema nga giatubang sa mga kabatan-onan, imbes nga hatagan sila og kahigayonan nga makat-on sa responsable nga paggamit sa social media.
Gipasiugda ni Truya-Abarientos nga importante usab ang paghatag og hustong giya ug digital education sa mga hamtong, ilabi na sa mga ginikanan ug guardians, aron mas mahibalo sila unsaon paggiya sa mga bata sa luwas ug responsable nga paggamit sa digital platforms.
Matud pa niya, bisan adunay negatibong epekto ang social media, aduna usab kini mga benepisyo sa mga kabatan-onan, lakip ang pagpahayag sa ilang mga opinyon, pagreport sa mga pang-abuso ug pagpangita og mga oportunidad nga makakwarta pinaagi sa online platforms.
Dugang pa sa CLB, mas angay nga hatagan og kahibalo ug suporta ang mga ginikanan ug uban pang hamtong aron matudloan ang mga menor de edad sa hustong paggamit sa social media, imbes nga hingpit silang pugngan sa pag-access niini.
Gipasabot usab ni Truya-Abarientos nga kon maghulat pa hangtod moabot sa 18 anyos ang usa ka tawo sa dili pa tudloan sa digital responsibility, mahimong mas lisod na ang paggiya kaniya tungod kay legal nga hamtong na siya.
Busa, mas maayong sugdan ang digital education samtang bata pa aron madala niya kini nga kahibalo hangtod sa iyang pagdako.
Gihisgotan usab sa CLB ang posibleng panagbangi sa total social media ban ug sa United Nations Convention on the Rights of the Child, nga nag-ila ug nanalipod sa nagkalain-laing katungod sa mga kabataan.
Bisan pa sa ilang pagsupak sa total ban, giklaro sa CLB nga wala sila mosupak sa regulasyon sa social media.
Hinuon, ilang gisuportahan ang mga lakang nga makapanalipod sa mga menor de edad, basta dili hingpit nga kuhaan ang mga kabatan-onan sa kahigayonan nga makakat-on ug makabenepisyo sa responsableng paggamit sa teknolohiya.
