Nagpahigayon ang China og mga military drills, lakip ang live-fire exercises, duol sa silangang bahin sa Luzon bag-ohay lang, sumala sa ilang pahayag niadtong Biyernes, nga nahitabo dungan sa tinuig nga Balikatan exercises tali sa Pilipinas ug Estados Unidos.
Kapin sa 17,000 ka sundalo gikan sa Pilipinas, Estados Unidos, ug uban pang mga kaalyado ang miapil sa Balikatan drills nga gipahigayon gikan Abril 20 hangtod Mayo 8.
Sa unang higayon, miapil usab ang mga combat troops gikan sa Japan, taliwala sa nagkataas nga tensyon sa rehiyon.
Sumala sa Southern Theater Command sa China, ang ilang Naval Task Group 107 nagpahigayon og nagkalain-laing operasyon, lakip ang live-fire shooting, sea-air coordination, rapid maneuvers, ug maritime replenishment aron masulayan ang ilang hiniusang kapabilidad sa kombat.
Wala maghatag ang China og eksaktong lokasyon o petsa sa maong drills, apan miinsistir nga kini mga “gikinahanglan nga operasyon” ug subay sa internasyonal nga balaod, isip tubag sa kasamtangang sitwasyon sa rehiyon.
Dugay nang gikondena sa China ang mga military exercises sa Pilipinas ug sa mga kaalyado niini, nga ilang giingong makapasamot sa tensyon sa rehiyon.
Samtang, ang mga drills sa Luzon kabahin sa Balikatan exercises, lakip na ang unang maritime strike drills nga gipahigayon sa Itbayat—ang pinakaamihanang bahin sa Pilipinas nga duol sa Taiwan. Aduna usab mga counter-landing live-fire drills nga ipahigayon sa Zambales, duol sa gikuwestiyon nga Scarborough Shoal.
Sa laing pahayag, gipasalig ni Chinese Premier Li Qiang nga ilang palig-onon pa ang depensa sa kadagatan pinaagi sa modernong teknolohiya ug mas lig-on nga kapabilidad aron mapanalipdan ang seguridad ug interes sa China sa gikuwestiyon nga kadagatan.
