CEBU – Patay ang usa ka Chinese national ug kritikal ang duha niini ka mga anak human nga gibanhigan sa Purok 3, Barangay Cubacub, dakbayan sa Mandaue.
Giila ang namatay nga si Yi Feng Guo Yang, 51 anyus ug ang mga anak niini nga sila si Ginabelle Guo Yang, 18, ug Stefhen Guo Yang, 16.
Gisaysay ni Police Colonel Julian Entoma, ang director sa Mandaue City Police Office nga paingun na unta uli ang mga biktima sa Vista Montana Subdivision, Barangay Cubacub, sa nahisgutang dakbayan, sakay sa ilahang L300 van, sa dihang kalit kini nga gibabagan sa upat ka mga kalalakin-an, sakay sa duha ka motorsiklo ug girakrakan ang mga biktima.
Girespondihan sa kapulisan ang maong alarma ug gidala ang mga biktima sa usa ka pribado nga tambalanan apan gideklarar nga dead on arrival si Yi Feng, samtang kritikal usab ang duha niini ka mga anak.
Narekober sa mga otoridad sa crime scene ang tulu ka kabhang sa bala sa 9mm nga pistola, duha ka kabhang ug usa ka buhing bala sa kalibre .45 nga pistola, usa ka itum nga helmet ug usa ka cellphone.
Gipalawman karun sa mga imbestigador ang nahisgutang krimen human nga nasayran nga usa ka negosyante ang namatay nga si Yi Feng.
