Giduaw sa Commission on Human Rights ang haya sa inahan ug duha niini ka mga anak nga gipangtigbas sa ilang padre de pamilya sa Purok Kamanggahan, Barangay Lutac sa Naga City, Cebu niadtong Enero 27, 2025.
Gikatahong maghimo og kaugalingong imbistigasyon ang buhatan sa CHR 7 kalabot sa kinatibuk-ang panghitabo nga miresulta sa kamatayon sa mag-inahan.
Unang gisinggit sa amahan ni Junielyn Jimenez, ang inahan nga gitigbas ang hustisya sa gidangatan sa iyang anak ug mga apo apan, matud niini nga dili igo ang mga kaso nga ipangsang-at sa suspetsado ug gani kinabuhi ang angayan nga ibayad niini.
Samtang, atol sa pakighinabi sa Bombo Radyo Butuan ngadto sa inahan ni Carlo Camporedondo, kinsang maong suspek sa pagpanigbas matud niini nga nakurta nalang siya sa gibuhat nga krimen sa iyang anak.
Gibutyag ni Lourdes Camporendondo nga aduna na’y gimintinar nga tambal ang iyang anak sa utok tungod kay nadaot sa iligal nga drogas.
Gidugang pa niini nga sa wala pa nahitabo ang krimen kay nanawag pa kini sa iyaha tungod kay dili makatulog si Carlo nga matud ni Lourdes nga posibleng tungod kini kay wala na makainom sa tambal ang iyang anak.
Ingon man nga nakapadala pa kini og kwarta sa suspek aron ipalit sa iyang tambal.
