CEBU CITY – Mi-umul ug duha ka investigation team ang Commission on Human Rights 7 arun nga mag-imbestigar sa pagkamatay sa giisip nga sharp shooter nga si SPO1 Adonis Dumpit.
Sa pakighinabi sa Bombo Radyo Cebu kang CHR 7 Regional Director Atty. Arvin Udron, gibutyag niini nga gikinahanglan nang mupatilwa ang ahensya gumikan kay mga sakop usab sa otoridad ang nakapatay sa maong pulis.
Matud ni Udron nga susihun nila kung wala ba’y nalapas sa human rights standard ang mga otoridad.
Giklaru sa director nga katuyu-an lang sa iyahang opisina nga mapamatud-an nga wala gayud maabuso si Dumpit.
Gihimug-atan niini nga usa lang kini ka pagpamatu-ud nga wala gi-harass sa CHR ang mga operatiba nga nagpahigayun ug legitimate function.
Kahinumduman nga niadtung adlaw nga Miyerkules, napatay sa usa ka joint operation sa NBI-Bohol at Regional Intelligence Division ang giisip nga sharp shooter ug multi-awarded police officer nga kanhi escort ni Cebu City Mayor Tomas Osmeña nga si SPO1 Adonis Dumpit sa may Dagohoy Circumferencial Rd., Barangay San Isidro, dakbayan sa Tagbilaran, probinsya sa Bohol, gumikan sa giingung mipabutu kini ngadtu sa mga operatiba.
