DAVAO CITY-Mitingog na ang Commission on Human Rights (CHR) kalabot sa mga insidente nga nahitabo sa Philippine National Police (PNP) PRO 11 operation nga misang-at og warrant of arrest batok kang Pastor Apollo Quiboloy niadtong Sabado, Agosto 24 sa Davao City.
Sa usa ka pamahayag, ang CHR nagkanayon nga kinahanglang likayan sa mga dumadapig ni Quiboloy ang pagpanghasi sa mga sibilyan nga nagtuman lang sa ilang katungdanan.
Kini may kalambigitan sa insidente diin usa ka special investigator gikan sa buhatan sa CHR Region 11 ang giingong gihulga sa mga sakop sa Kingdom of Jesus Christ (KOJC).
Samtang, gipahinumdoman sa komisyon ang PNP PRO 11 nga kutob sa mahimo likayan ang paggamit sa wala kinahanglana nga puwersa ug kapintasan sa ilang mga operasyon.
Dugang pa sa ahensya nga ang duha ka partido kinahanglan nga mosunod lamang sa hustong proseso sa balaod ug tahuron ang mga probisyon sa konstitusyon sa nasud.
