Naglunsad ang Commission on Human Rights (CHR) og ‘independent investigation’ sa engkwentro tali sa militar ug giingong mga miyembro sa New People’s Army (NPA) sa Toboso, Negros Occidental nga mikalas og 19 ka kinabuhi.
Sumala sa komisyon, ang imbestigasyon gipahigayon pinaagi sa ilang opisina sa Negros Island Region (NIR).
Gihimo kini human sa mga impormasyon gikan sa lokal nga mga tigpasiugda sa tawhanong katungod nga nag-aghat sa CHR sa pakig-koordinar sa civil society organizations, local authorities, ug security forces.
Gihisgutan usab sa komisyon ang gatusan ka mga pamilya nga mibiya sa ilang mga panimalay human sa maong engkwentro.
Kahinumduman nga 19 ka giingong mga rebelde ang namatay human sa engkwentro sa mga tropa sa militar niadtong Abril 19 sa Barangay Salamanca.
Lakip sa mga namatay mao ang duha ka Filipino-American nga sila si Lyle Prijoles ug Kai Dana-Rene Sorem.
Namatay usab ang community journalist nga si RJ Ledesma ug ang lider-estudyante sa University of the Philippines-Diliman nga si Alyssa Alano.
Sa miaging pahayag, gilimod ni AFP Chief of Staff General Romeo Brawner Jr. nga ang pipila sa mga namatay mga sibilyan.
Iyang giinsistir nga ang mga sundalo mismo nakakita kang Alano nga nagdalag mga armas nga nakig-away batok sa mga pwersa sa militar.
