Mihatag og reaksyon ang beteranong aktor nga si Christopher de Leon kalabot sa mainit nga panagbangi sa iyang mga anak nga sila si Lotlot ug Ian de Leon mahitungod sa kabilin sa ilang inahan nga mitaliwan nga Superstar ug National Artist nga si Nora Aunor.
Si Lotlot ang kamagulangang sinagop nila Nora ug Christopher kauban nila Matet, Kenneth, ug Kiko samtang si Ian ang nag-inusarang biological nga anak sa kanhi magtiayon.
Nidilaab ang isyu human gipadayag ni Ian niadtong Abril 2025 nga siya ang legal nga manununod ug gitahasan sa pagdumala sa mga kabtangan sa ilang inahan pinaagi sa pagtukod og One Person Corporation (OPC), nga naglangkob sa Nora Aunor Enterprise ug Nora Aunor Foundation.
Atol sa usa ka interbyu, gibutyag ni Christopher nga naningkamot siyang likayan ang pagpanghilabot sa panaglalis sa iyang mga anak.
Bisan pa niini, gipadayag sa aktor nga personal niyang gistorya nga tagsa-tagsa sila Lotlot ug Ian aron paminawon ang ilang tagsa-tagsa ka habig taliwala sa ilang panagbangi.
