Prioridad karon sa Criminal Investigation and Detection Group (CIDG), Brig.Gen. Nicolas Torre III ang paggukod sa mga gipangita sa balaod.
Pipila sa gitumbok niini mao ang pagpangita kang kanhi presidential spokesperson Harry Roque nga adunay warrant of arrest gikan sa House of Representatives tungod sa wala pag-kooperar sa imbestigasyon sa mga magbabalaod sa POGO.
Lakip usab sa iyang gukdon mao si kanhi Bureau of Correction chief Gerald Bantag nga nag-atubang og kasong pagpatay sa magsisibya nga si Percy Lapid.
Bisan pa man nga nagpaabot pa kini sa mando ni Philippine National Police (PNP) chief Gen. Rommel Francisco Marbil sa pagkasikop kang Roque, gipasalig ni Torre nga andam silang gukdon ang kanhi opisyal sa gobyerno ug ang mga wanted sa balaod.
Una nang niingon si Torre nga andam niyang pangitaon ang mga sad-an sa balaod bisan og magtago-tago sila sa ilawom sa yuta sama sa pagpangita sa lider sa Kingdom of Jesus Christ nga si Apollo Quiboloy.
