CEBU CITY — Gibutyag ni Councilor Dave Tumulak nga adunay gi-alokar nga budget ang lokal nga pangagamhanan sa dakbayan sa Sugbo alang sa bakuna sa COVID-19.
Matod ni Councilor Tumulak nga sa panahon nga aduna na’y available nga bakuna nga mapalit ang National government, adunay i-alokar niini alang sa syudad sa Sugbo.
Segon ni Tumulak, ang chairperson sa committee on disaster risk reduction and management sa konseho, nga suta-on usab sa City government kung pila ang mahatag alang sa syudad diin andam matod pa ang Cebu City nga mopalit kung ugaling magkuwang ang bakuna.
Nasayran nga mokabat sa P400 million ang gi-alokar nga kantidad sa kapin P10 billion nga budget sa syudad sunod tuig alang sa COVID-19 response.
Samtang gikumpirmar usab ni Tumulak nga nagka istorya si Cebu City Mayor Edgardo Labella ug si COVID-19 Vaccine Czar Carlito Galvez Jr. diin aduna matod pa’y sigurado usab nga igahing bakuna sa dakbayan sa Sugbo.
Subay niini, subling gi-awhag sa opisyal ang publiko sa pagsunod kanunay sa mga health and safety protocols batok sa coronavirus ilabi na nga adunay gibantayan karon nga bag-ong strain sa maong virus.
