CEBU CITY — Mokabat sa P160,000 ang danyos sa nahitabo nga sunog sa Maribago National High School dakbayan sa Lapu-lapu kagahapon.
Gibutyag ni Senior Fire Officer 1 Hadji Samonte, ang fire investigator sa Lapu-lapu City Fire Department, nadawat nila ang maong alarma pasado alas-4:36 sa hapon ug gisaka kini ngadto sa 2nd alarm.
Daling miresponde ang kabumberuhan sa nasunog nga tunghaan ug napawong kini pagkalabay sa usa ka oras.
Base sa inisyal nga imbestigasyon, miulbo ang kayo gikan sa canteen sa tunghaan diin adunay electric fan nga wala maibot sa saksakanan.
Gilamoy sa kayo ang upat ka mga classroom, usa ka canteen, ug prayer room.
Pahimangno pa ni Samonte ngadto sa mga magtutudlo, principal ug gwardya sa skwelahan nga i-off ang breaker matag Biyernes aron dili mabuto ang mga nag-andar nga appliances. (Lahvi Quiñones)
