CEBU – Gibandera sa Commission on Audit (COA) ang desisyon sa Talisay City Government nga mopalit og high-end laptops ug personal computers (PC) nga gigamit sa engineering ug video editing purposes.
Sa 2021 Annual Audit Report niini para sa Talisay City, gitawag sa state auditing body ang atensyon sa kagamhanan sa dakbayan nga hatagan og rason ang pagpalit niini og lima ka PC sets, ug duha ka high-end nga laptop nga mokabat sa kinatibuk-ang P610,750.
Gihulagway sa COA nga ang gasto sa lokal nga kagamhanan kay ‘imprudent use of government funds’ tungod ang naulahi wa makadepensa sa panginahanglan sa pagpalit og high-end consumer electronics.
Sa pagkutlo sa COA Circular No. 2012-003,nagkanayon ang state auditors nga ang ‘high-end o mahal nga mga modelo/brand sa electronic gadgets sama sa mobile phones, desktops, ug laptops, gikonsiderar nga unnecessary expenditures’ gawas lang kon kini hustong tarungon.
Nasayran nga gituyo ang lima ka PC set ug usa sa mga high-end nga laptop alang sa City Engineering Office samtang ang laing high-end nga laptop gibutang ubos sa Office of the City Mayor ug gipamalit kini tali sa Mayo ug Hunyo sa 2021.
