Girekomendar sa Commission on Audit (COA ang mas estrikto nga mga lakang, lakip na ang pagpugong sa sweldo ug pagpahamtang og mga silot, batok sa mga opisyal sa Department of Education (DepEd) nga napakyas sa pag-liquidate sa cash advances (CAs) nga mokabat sa P6.96 bilyon sa Disyembre 31, 2023.
Sa 2023 Annual Audit Report niini, gibandera sa COA ang kapakyasan sa DepEd sa estrikto nga pagsunod sa mga balaod ug regulasyon, nga miresulta sa pagtipon sa mga CA nga wala ma-liquidated.
Diin ang mga nag-unang kakulangan naglakip sa paghatag sa mga CA nga walay saktong awtoridad, pagbalhin sa mga pundo tali sa mga accountable officers (AOs), kapakyasan sa pag-bonding sa mga AO sa hustong paagi, ug pagbayad sa mga galastohan sama sa Service Recognition Incentives (SRI) pinaagi sa mga CA imbes sa direktang pagbayad.
Basi sa report, ang mga nag-unang rehiyon nga adunay pinakataas nga unliquidated balances naglakip;
Rehiyon VII (Central Visayas): 1.31 bilyon
Rehiyon VIII (Eastern Visayas): 1.01 bilyon
Rehiyon XII (SOCCSKSARGEN): 819.4 milyon
Rehiyon IX (Zamboanga Peninsula): 537.1 milyon
Rehiyon VI (Western Visayas): 513.9 milyones
samtang
NCR (National Capital Region): 301.9 milyones.
Aron matubag kini, girekomendar sa COA ang mosunod:
Hunongon ang paghatag og bag-ong cash advance sa mga opisyal nga adunay pending nga balanse.
Pag-isyu og mga suwat sa pagpangayo sa mga aktibong empleyado aron mapugos ang pag-liquidate.
Pagpugong sa mga suweldo ug mga bayranan sa mga delingkwenteng AO hangtod nga ma-settle ang mga obligasyon.
Pagpahamtang og silot ubos sa mga lagda sa Civil Service Commission (CSC) sa mga delay.
Isuwat ang mga dormant nga account nga wala masulbad sulod sa kapin sa usa ka dekada.
Namatikdan usab sa taho nga sa pipila ka mga kaso, ang mga outstanding balances naglambigit sa mga responsableng opisyal nga miretiro, ni-resign, nag-AWOL, o mibalhin, nga nakapakomplikado pa sa proseso sa pagbawi.
