Nakakita ang Commission on Audit (COA) og dagkong isyu sa estruktura sa Cebu City Medical Center (CCMC), ilabi na sa Phase 3 ug Phase 4 sa proyekto, samtang kapin ₱1.3 bilyon na ang gigasto apan wala pa gihapon mahuman ang bag-ong ospital.
Gibutyag sa COA sa 2025 Annual Audit Report nga adunay mga kakulian sa engineering, mga isyu sa kontrata, ug kalangan sa pagpatuman sa proyekto nga nakaapekto sa pag-uswag sa konstruksyon sa CCMC.
Lakip sa mga gipunting sa COA ang kakulang sa detalyadong engineering studies, mga extension sa kontrata nga walay igong basehan o dokumentasyon, ug pagkapakyas sa pagsumite sa gikinahanglang teknikal nga mga papeles.
Tungod niini, miresulta ang mga problema sa pagpadayon sa proyekto ug napugos ang kagamhanan sa Dakbayan sa Sugbo sa pag-terminate o pagkansela sa pipila ka mga kontrata sa lain-laing hugna sa konstruksyon.
Base sa rekord sa COA, gisusi sa audit ang lima ka mga kontrata alang sa bag-ong CCMC, diin ang kinatibuk-ang contract value miabot sa kapin ₱1.9 bilyon, samtang ang aktuwal nang nagasto sa siyudad mikabat sa kapin ₱1.13 bilyon.
Bisan pa niini, nagpabilin nga wala pa mahuman ang proyekto, nga dugay nang gipaabot sa mga residente human maguba ang daang CCMC tungod sa linog sa Bohol niadtong 2013.
Sa laing bahin, gisuportahan ni Cebu City Mayor Nestor Archival ang pagkuha og usa ka independenteng third-party nga grupo aron magmonitor ug motan-aw sa kalidad ug kahimtang sa konstruksyon sa CCMC.
