Misaad si Gilas Pilipinas head coach Tim Cone nga tun-an pag-ayo ang kinatibuk-ang performance sa national team human sa hingpit nga pagtangtang niini sa FIBA Asia Cup 2025.
Kon atong hinumdoman, ang Team Australia maoy nidominar sa quarterfinals match batok sa Gilas Pilipinas, 84-60 – ang hinungdan sa hingpit nga pagkawagtang sa Team Philippines sa nahisgutang torneyo.
Matod ni Cone, bisan og sayo pa kaayo, ang team siguradong mo-review sa tanang video ug overall performance aron magamit sa umaabot nga mga duwa sa national team.
Gusto sa beteranong coach nga matino ang nag-unang rason sa sayong pagkapandol sa Gilas samtang nakig-atbang sa Team Australia, bisan og nakapakita na kini og clutch performance sa miaging elimination games.
Sa laing bahin, nagtuo si Cone nga dili na kinahanglang ilisan ang mga sakop sa national team.
Dugang niini nga walay mahitabo kon mag-ilis lang ta og mga player nga dili tun-an unsaon pagpalambo sa performance sa nasud.
Sa laing bahin, ang Gilas makigsangka usab sa Australia ug New Zealand sa Group A sa World Cup Qualifiers sa ulahing bahin ning tuiga.
