CENTRAL VISAYAS- Gi-activate sa Coast Guard District Central Visayas (CGDCV) ang ilang Disaster Response Group aron maseguro ang kaluwasan sa mga biyahero atol sa umaabot nga Semana Santa ug summer vacation ubos sa OPLAN Biyaheng Ayos: Semana Santa and Summer Vacation o SUMVAC 2026.
Kini ubos sa pagpangulo ni Rear Admiral Agapito B. Bibat sa Philippine Coast Guard, diin sugod Marso 27, 2026 gipahugtan ang seguridad ug kaandam sa tanang Coast Guard stations sa Central Visayas.
Sumala sa CGDCV, gipataas usab ang operational readiness sa ilang area of responsibility ilabina sa mga pantalan ug baybayon tungod sa gilauman nga pagdagsa sa mga pasahero atol sa Semana Santa ug summer vacation.
Tumong sa inisyatibo nga mapadayon ang luwas, organisado, ug hapsay nga maritime operations aron malikayan ang insidente samtang nagbiyahe ang publiko.
Gipasabot sa CGDCV nga magpadayon sila sa pagmonitor ug pagpatuman sa seguridad hangtod matapos ang OPLAN SUMVAC 2026.
