HIMAMAYLAN CITY, NEGROS OCCIDENTAL- Napakyas ang duha ka lalaki nga misuway sa pagkawat sa Certificate of Candidacy sa usa ka aspiring candidate isip mayor nga si Engr. Vicente Genova sa Himamaylan City, Negros Occidental atol sa katapusang adlaw sa filing sa COC.
Daling nakaikyas ang duha ka lalaki sakay sa traysikol paingon sa national highway diin aduna silay mga kauban nga nagpaabot ug nagmotorsiklo.
Gani, desidedo si Genova nga pasakaan og kaso ang duha ka tawo nga wala pa mailhi kinsang giingong gisundan usab kini hangtud sa lugar diin kini gi-snatch ang iyang COC.
Atol sa pakighinabi sa Bombo Radyo Cebu ngadto kang Atty. Lionel Marco Castillano, ang Comelec Negros Island Region (NIR) Regional Election Director nga sulod sa 25 ka tuig niini sa pagdumala sa COMELEC, karon lang kini nakasugat og COC snatching.
Hinungdan nga iya gayud kini nga hatagan og pagtagad, ingon man nga imbistigahan tungod sa talagsaon nga panghitabo.
Ingon man nga gimanduan na usab ang Himamaylan City Police Station nga magpahigayon og imbestigasyon sa nahitabong insidente ug masayran ang mga ilhanan sa mga suspek ug matumbok ang motibo niini.
