CEBU CITY- Gihimakak sa buhatan sa Commission on Elections – Central Visayas (Comelec-7) ang pasangil nga gitikas ang mga Automated Counting Machines (ACMs) nga gigamit sa nakalabayng piniliay niadtong Mayo 12, 2025.
Kini ang gipamahayag ni Atty. Francisco Pobe, ang Regional Director sa Comelec-7 sa eksklusibong pakighinabi sa Bombo Radyo Cebu Newsteam niini nunot sa kontrobersiyang mitumaw online nga nakadaog lang ang usa ka kandidato sa lalawigan sa Sugbo tungod sa pagmaniobra sa mga makina sa piniliay.
Matod pa ni Pobe nga gawasnon ang mga tawo sa pagpadayag sa ilang sentimento ilabi na kung ang ilang gisuportahang kandidato kay napildi sa nahipos nga eleksyon sanglit kay nahimo kining pamatasan na sa uban nga proseso sa piniliay ang pakyason kung sila mapildi og dili ang tiunay nga demoktatikanhong tingog sa mga botante.
Gani nitataw kini nga transparent ang ilang proseso gikan sa mga nagkadaiyang mga presinto hangtod na nga miabot ang resulta sa mga Board of Canvassers diin adunay mata sa publiko ang nagbantay lakip na ang mga sakop sa mga watchers sa kada Partido ug ang mga alagad sa tigbalita o media.
Gihimug-atan ni Pobe nga kining mga alegasyon kay dili makalabay og hugaw nga reputasyon sa Comelec kay kanunay na mang-gawas ang susamang pasangil basta humana ang eleksyon og kung dili pabor ang resulta sa ilang kampo sukwahi kung iagi kini sa tukmang proseso samtang nagpadayon ang piniliay sa matag presinto.
Ang maong pamahayag sa Comelec-7 kay nunot sa gi-post online ni Byron Garcia kinsang igsoon ni Outgoing Cebu Governor Gwendolyn Garcia sa pagkapildi niini kang Governor-elect Pamela Baricuatro nga matod pa ginganlan kini ni Byron nga “Smartmatic Governor” si Baricutro tungod tikas ang kadaugan niini kay nganong nakadaog man ang ubang i-endorso ni Gwen ubos sa partidong 1Cebu apan siya kay gilubong sa resulta sa eleksyon.
