CENTRAL VISAYAS-Gipahibalo sa buhatan sa Commission on Elections (Comelec) nga sa pagbana-bana kay anaa na sa 90% ang kaandam sa ilang buhatan sa nagsingabot nga piniliay karong umaabot Mayo 12, 2025 para sa National ug Local positions.
Kini ang gibuhiang pamahayag ni Omar Sharif Mamalinta ang Communications Focal Point Person sa Comelec-7 sa eksklusibong pakighinabi sa Bombo Radyo Cebu.
Kun diin pamahayag pa niin nga tanang aktibidad sa buhatan uban sa pakig-alayon sa ubang ahensya sa gobyerno kay nagmalapuson ra sa gikatakdang panahon og pipila nalang ang han-ayonon aron sa hingpit nga kaandam sa adlaw sa piniliay.
Gani dugang pa niini nga nagpadayon pa ang ilang pagbansay-bansay sa mga Electoral Boards (EB) ug uban poll workers nga may kalabot sa pag-operate sa Automated Counting Machines (ACM).
Pasalig niini nga pabiling transparent ang proseso sa eleksyon aron malikayan ang pasangil nga natikas ang usa ka kandidato sa integridad sa piniliay isip haligi sa demokrasya.
Bana-bana nga karong buwan sa Abril kay mahataod na ang mga election paraphernalia lakip ang mga balota aron masiguro kining functional sa adlaw sa eleksyon.
