CEBU CITY-Gipahinumdoman sa Commission on Election (Comelec) ang mga kandidato sa Barangay ug Sangguniang Kabataan (SK) election nga dili una magpahigayon og ‘early campaigning’ human sa ilahang pag-file og certificate of candidacy, diin nagsugod na karung adlawa.
Gibutyag ni Atty. Ferdinand Gujilde, Election Officer sa Comelec – Cebu City South District, nga lahi ang balaud sa Barangay ug SK election, diin sa higayon nga ma-file na ang certificate of candidacy, ikonsiderar na sila nga kandidato hinungdan nga mangampanya na sa gitagana nga panahon.
Matud ni Atty. Gujilde nga mahimong mag-atubang og disqualification ang usa ka kandidato o mapasakaan og kasong may kalabotan sa early campaigning kung mangampanya nga wala pa ang Oktubre 19 hangtud sa Oktubre 28.//
Samtang, gipahibalo sa naasoy nga election officer nga abli ang buhatan sa Comelec nga ilahang gi-accomodate ang tanang mo file sa certificate of candidacy sugod karung adlawa Agosto 28 hangtud sa Setyembre 2, alas 8 sa buntag hangtud sa alas 5 sa hapon.
Gitino niini nga dawaton sa gihapon nila ang certificate of candidacy sa usa kandidato bisan og alas 5 na hapon, basta lang nga anaa na kini sa buhatan sa Comelec.
Sa katapusang adlaw, Setyembre 2, adlaw nga Sabado, mipahinumdom si Atty. Gujilde nga bisan pa man og alas 5 na sa hapon maabot ang usa ka kandidato, basta anaa lang sa 30-meters sa palibot sa Comelec, ilaha sa gihapon kining dawaton.
Pahimangno lang ni Atty Gujilde sa mga mo kandidato nga ihatag kanila ang tulo ka mga original nga kopya sa certificate of candidacy ug dili kini sila modawat og photocopy.
