CEBU – Nipahigayon og final testing sa Vote-Counting Machines (VCMs) ang Commission on Election (COMELEC)sa lakip na ang pagselyar sa mga balota sa clustered precincts, upat ka adlaw sa dili pa ang piniliay.
Sigon pa ni Marilou Paredes, ang acting election officer sa South District sa dakbayan,nga usa kini sa katapusang pamaagi nga ilang gihimo samtang nagkaduol ang piniliay.
Gibutyag ni Paredes nga bisag adunay ginagmay nga problema sama mga precincto nga nagkuwang og digital signature, nasulbad raman gihapon ug maayo ra ang resulta.
Gipahibaw niini nga adunay 530 ka VCMs nga gipakatap sa South District ug 480 ka VCMs sa North District.
Sa pagkakaron, anaa na sa voting centers ang mga makina selyado ug luwas.
Gi-angkon ni Paredes nga naguol kini gumikan gamay ra ang contingency machines nga gigahin alang sa dakbayan sa Sugbo kung adunay mapakyas nga VCM.
Apan, gitino niini nga tungod ang Cebu City mao ang central hub sa rehiyon, dili sila magproblema sa pag-ilis sa mga nagdaot nga VCM ug anaa ra duol ang technical support.
Gihatagan usab og kasiguruhan sa mga power distributor ang COMELEC nga stable ang kuryente panahon sa eleksyon ug kung ugaling maputol ang kuryente, adunay mga independent batteries ang matag VCM nga magamit sulod sa 12 ka oras.
