CEBU – Dili mag-kumpyansa ang Commission on Election (Comelec) bisan pa man nga napasar na sa ikatulo ug katapusang pagbasa sa House of Representatives ang pagsibog sa Barangay ug SK elections.
Gibutyag ni Atty. Lionel Marco Castillano, Comelec Cebu Province election supervisor, nga hangtud nga dili pa gayud kini mahimong balaud, magpadayon ang ilahang preparasyon.
Matud pa, dili gusto ang Comelec nga mag-apas sa ilahang oras kung ugaling mahinayon ang eleksyon, diin giingong nahitabo na kini niadtong tuig 2010.
Hinuon, giangkon ni Castillano nga sayang ang mga papel ug ink sa pag-imprinta sa mga voter’s list gumikan kay kung isibog ang eleksyon, mubalik na usab sila sa voter’s registration, hayan mapun-an gayud ang mga botante ug dili na magamit ang mga listahan nga una na nilang gi-print.
Gitino usab niini nga wala pa may pondo nga nagamit ang Comelec sa ilahang kasamtangan nga preparasyon gumikan kay nagpadayon pa man ang bidding sa kaulohan ug ang ilahang gigamit karun kay ang mga sobra nila nga papel ug ink sa nakalabay nga eleksyon.
