CENTRAL VISAYAS-Gi-anunsyo sa Commission on Elections (Comelec) kaniadtong Nobyembre 8, Miyerkules sa hapon nga dili na ipadayon ang espesyal nga eleksyon aron pun-on ang bakanteng posisyon ni Negros Oriental 3rd District Representative Arnolfo “Arnie” Teves Jr.
Kini gumikan nga nakadawat ang Comelec sa House Resolution No. 154 gikan sa House of Representatives nga nag-awhag niini nga “ikonsiderar pag-usab ang ilang resolusyon alang sa pagpahigayon sa espesyal nga eleksyon” sa Third District sa Negros Oriental tungod sa kasamtangan nga kahimtang sa maong probinsya.
Samtang niadtong buntag sa Miyerkules, ikatulong adlaw sa pag-sang-at og certificate of candidacy, naka-file si Negros Oriental gobernador nga si Pryde Henry Teves aron nga isip hulip sa iyahang igsoon nga si Negros Oriental 3rd district Representative Arnolfo “Arnie” Teves Jr.
Matod sa Commission on Elections (Comelec) niadtong Miyerkules, nga atol sa ikatulong adlaw sa pag-file sa COC alang sa special election sa probinsiya, si Henry Teves maoy ikaduhang kandidato nga mi-file og COC lakip na ang ikatulo nga si incumbent Bacong Mayor Lenin Alviola alang sa nabakante nga pwesto.
