Gimando sa Department of the Interior and Local Government (DILG) ang hugot nga pagpatuman sa “Anti-Epal” policy sa tibuok nasud aron tangtangon ang mga ngalan ug hulagway sa mga opisyal gikan sa mga proyekto sa gobyerno.
Ubos sa DILG Memorandum Circular No. 2026-006, gidili na ang pagbutang og ngalan, litrato, logo, inisyal, color motif, o slogan sa mga politiko sa bisan unsang signage, marker, o tarpaulin sa mga proyekto nga gipundohan sa katawhan.
Sakop niini ang tanang opisyal sa probinsya, siyudad, lungsod, hangtod sa barangay, lakip na ang mga attached agencies sa DILG.
Subay niini, ekslusibong gikab-ot sa Bombo Radyo Cenu Newsteam ang habig ni Atty. Francisco Pobe, ang Regional Director sa COMELEC7 diin iyang gikabutyag nga ang maong bag-ong lakang nga nilusot karon gikan sa DILG, ipatuman kini atol sa election period ubos usab sa lakang sa COMELEC.
Ingun man iya usab nga giklaro nga outside election period, ang ubang ahensya sa gobyerno usab ang mopatuman niini sama sa DILG, ang mo-implentar sa “Anti-Epal” policy, ug dili na partikular ang COMELEC.
Gitataw usab ni Pobe nga ang “Anti-Epal” policy dugay na nga giimplementar sa COMELEC labi sa election period.
Subay sa pagpa-implenter, gidili niini ang pagpamutang og mga hulagway, pangalan, ug uban pang matang sa propaganda nga dili lakip sa ilahang kandidasiya.
Samtang, ubos sa pag-anunsyo sa DILG kabahin niini, giawhga nila ang publiko nga i-report ang bisan kinsang opisyal nga dili mosunod niini nga kamanduan subay sa panawagan ni Presidente Ferdinand Marcos Jr. alang sa madasigon ug limpyo nga serbisyo.
