Ikonsiderar sa Commission on Elections (COMELEC) ang paglakip sa Bangsamoro Autonomous Region in Muslim Mindanao (BARMM) sa umaabot nga voter registration exercise nga gikatakdang sugdan sa Hulyo 1 hangtod Hulyo 11.
Matod ni COMELEC Chairman George Erwin Garcia, ilang gihuna-huna nga walay makabotar sa Sangguniang Kabataan sa Bangsamoro kong dili sila maapil sa proseso sa pagparehistro.
Hinungdan nga ang COMELEC En Banc morekomendar nga ipahigayon ang voters registration sa tibuok nasod sunod buwan aron ang mga batan-on nga nag-edad og 15 ngadto sa 17 anyos makaparehistro sa Bangsamoro.
Gidugang ni Garcia nga dawaton nila ang tanang matang sa rehistrasyon sa Hulyo: bag-ong registration, transfer ug reactivation sa voters status.
Samtang, niingon usab siya nga iapil nila sa resolusyon nga ipagawas ang katin-awan nga kadtong magparehistro sa Hulyo gikan sa Bangsamoro dili gihapon makabotar sa BARMM Parliamentary Election nga ipahigayon karong Oktubre 13, ang ilang boto alang sa Barangay ug Sangguniang Kabataan Election nga ipahigayon sa unang adlaw sa Disyembre.
Kalabot niini, gipahibalo usab ni Garcia nga ilang i-pilot test ang gipanindot nga Register Everywhere, Anytime sa Metro Manila. Tungod sa tinguha nga makaparehistro bisan gabii, sugdan una nila ang pagsulay sa pagbutang og registration booths sa pipila ka dapit sama sa bus terminals, ug call centers.
Subay niini, si Garcia nipasalig nga dili kini makaapekto sa budget sa komisyon ug nipasalig nga tanang moserbisyo niini makabaton og tukmang honoraria sa ilang overtime. | Bombo Irene Ardiente
