CEBU – Milihok ang Commission on Elections (Comelec) en banc aron ipa-annul ang kadaugan ni Negros Oriental Governor Pryde Henry Teves niadtong Mayo 9.
Kini, human gipamatud-an sa poll body ang resolusyon sa ikaduhang dibisyon niini nga nagdeklarar kang Grego Degamo isip nuisance candidate sa probinsya sa 2022 gubernatorial race.
Sa botasyon nga 3-2, mibtoar ang Comelec en banc sa pagdumili sa motion of reconsideration ni respondent Grego, human mitugot ang Second Division niadtong Disyembre 16, 2021 sa petisyon ni kanhi Gobernador Roel Degamo nga ideklarar nga nuisance candidate si Grego ug kanselahon ang iyang certificate of candidacy.
Una nang nasayran nga gigamit ni Grego ang ngalan nga “Ruel” sa iyang pagtinguha sa pagkagobernador.
Tungod sa absence of a temporary restraining order o injunctive writ nga giisyu sa Korte Suprema, niluwat ang Comelec og Certificate of Finality and Entry of Judgment niadtong Martes nga nagmando sa Special Provincial Board of Canvassers (SPBOC) sa Negros Oriental nga ipa-annul ang proklamasyon ni Teves ug pasidunggan ang mga boto nga nakuha ni Grego pabor kang Roel Degamo.
Gipasabot sa Comelec en banc nga napakyas si Grego paghatag og pruweba nga lehitimong nailhan siya nga “Ruel Degamo” sa dihang gipili niya nga gamiton ang iyang giingong apelyido nga “Degamo” ug “kalit nga napili” nga gamiton ang “Ruel” isip iyang angga nga nakapalibog kaniya uban sa petitioner kansang ngalan mao si “Roel Ragay Degamo.”
Naka-obserbar usab ang Comelec Second Division nga ang apelyido ni Grego kay “GAUDIA” apan mipili nga gamiton ang DEGAMO alang sa katuyoan sa 2022 elections nga , “ang apelyido niadtong nagkustodiya kaniya apan wala legal nga nagsagop kaniya.”
Gimandoan ang SPBOC nga mag-convene karong Lunes, Oktubre 3, sa Comelec session hall sa Manila aron usbon o i-correct ang certificate of canvass of votes ug proclamation alang sa gobernador sa probinsiya, pag-amendar sa statement of votes sa presinto ug pagproklamar sa kandidato nga nakakuha sa pinakataas nga ihap sa mga boto base sa giusab nga statement of votes sa presinto isip duly elected governor sa Negros Oriental.
