CEBU-Gikinahanglan nga suportahan sa Philippine government ang ipahigayon nga imbestigasyon sa International Criminal Court (ICC) kalabot na sa war on drugs sa Duterte administration.
Gibutyag ni Atty. Arvin Udron, ang regional director sa Commission on Human Rights (CHR-7) nga ang ipahigayon sa ICC kay usa lamang kini ka imbestigasyon ug dili pa trial hinungdan nga walay angayan nga kabalak-an ang gobyerno sa nasud.
Matud pa, angayan kini nga suportahan sa kasamtangang administrasyon ni President Ferdinand ‘Bongbong’ Marcos, Jr. pinaagi sa paghatag ug mga ebidensya arun nga makuha usab ang habig sa gobyerno sa Pilipinas.
Giingong higayon kini arun nga depensahan sa nasudnon nga pangagamhanan ang maong pasangil kalabot na sa maduguon nga pakigbatok sa iligal nga drogas sa nakalabay nga administrasyon.
Gipasabot ni Udron nga kung walay makita nga basihan ang ICC sa maong pasangil, giingong walay rason ang maong korte nga ipadayon ang trial kalabot na sa maong kaso.
