Andam ang Compostela Municipal Police sa Northern Cebu nga atubangon ang mga pasangil gikan sa pamilya sa usa ka suspek nga namatay samtang anaa sa kustodiya sa kapolisan niadtong Biyernes, Hunyo 13, 2025.
Kini ang gibutyag sa maong police station human nag-viral sa social media ang usa ka post diin nangayo og hustisya ang pamilya sa namatay nga suspek nga giilang si Arnold Duran kinsa nadakpan human sa drug buy-bust operation sa nahisgutang lungsod.
Ang nasangpit nga post nipasangil sa mga pulis nga mikulata kang Arnold nga nakaangkon og mga bun-og ug samad sa nagkadaiyang bahin sa iyang lawas.
Sa eksklusibong pakighinabi sa Bombo Radyo Cebu Newsteam kay Police Captain Lino Tryss Galvan III, ang Hepe sa Compostela Municipal Police, gipamahayag niini nga napatay ang suspek nga si Arnold tungod sa myocardial infraction ug hypertension ug nakuha ang mga samad niini tungod kay nisukol kini niadtong nadakpan siya sa nahisgutang buy-bust operation.
Sa dihang nakahiagum og mga samad sa lawas si Arnold samtang nagpadulong sa police station sa maong lungsod, ang mga arresting officers nakahukom nga dali siyang gidala sa tambalanan, diin siya namatay.
Gipasalig ni Police Captain Galvan nga padayon pa ang imbestigasyon sa maong insidente ilabi na ang kamatayon sa biktima diin ipaubos sa autopsy ug special report.
