CEBU CITY – Nakatigom ug ubay-ubay nga hinabang ang Multi-Sectoral Advisory Board sa dakbayan sa Sugbo human sa ilahang gipahigayon nga “Concert for a Cause” kagabii.
Sa eksklusibo nga pakighinabi sa Bombo Radyo Cebu kang kanhi Cebu City Councilor ug miyembro sa MSAB Erik Espina, gibutyag niini nga ang maong free concert ang gititulohan ug “Tabang Cotabato” diin tuyo ug tumong ang pagtabang sa mga quake victims sa Cotabato.
Matud ni Espina nga usa ka libre nga concert ang ilahang napahigayon sulod sa Plaza Independencia kung diin gidugok kini sa mga Sugbuanon.
Sigon pa nga pipila usab ang wala na mulantaw sa concert ug igo lang mihatag sa ilahang hinabang.
Nasayran nga 14 ka mga banda ang nakatukar sa maong free concert gikan sa 30 nga unang gusto nga musalmot.
Gipasabot sa kanhi konsehal nga gikan sa 30, gihimo na lang nila ug 14 gumikan sa usab sa ‘limited’ nga oras.
Gitataw ni Espina nga ang tanang “in kind” ug “in cash” nga ilahang natigom human sa maong free concert, gihatud na sa central command arun usab nga mahatod na kini ngadto sa North Cotabato.
Subay niini, iyahang gipasalamatan ang tanang nagpaabot sa ilahang mga hinabang kung diin gipasigarbo pa niini nga mao kini ang ti-unay nga kasingkasing sa usa ka Sugbuanon, ang pagka-matinabangon.
