CEBU – Nisaad si Cebu City Councilor ug South District Rep.-elect Eduardo Rama nga trabahuon ang pagpalabang sa “Freedom of Information (FOI) Ordinance” sa dili pa matapos ang ilang termino isip mga sakop sa local legislative body karong Hunyo 30.
Nahimo ang pamahayag ni Rama human sa pag-apelar sa Cebu Citizens-Press Council (CCPC), usa ka organisasyon sa media outfits sa Sugbo, ngadto sa kasamtangang konseho sa dakbayan sa pagpasar sa FOI ordinance.
Gikatahong gipaagi ni Rama ang panawagan tungod sa iyang pakiglambigit sa mga miyembro sa lokal nga media.
Sa usa ka pamahayag, nagkanayon ang CCPC pinaagi ni executive director Pachico Seares, nga ang gisugyot nga lakang nagtinguha sa paghatag og “local mechanism” sa pagpatuman sa Executive Order No. 2 ni Presidente Rodrigo Duterte nga gipagawas niadtong Hulyo 23, 2016 nga nagtugot sa hingpit nga pagbutyag ug transparency sa mga opisina sa gobyerno.
Nasayran nga ang gisugyot nga ordinansa anaa na sa agenda alang sa ikatulong pagbasa ug aprobahan kini sa mayor sa syudad.
Giklaro man hinuon ni Rama nga nahunong ang pagtrabaho sa pagpalabang sa FOI ordinance tungod sa kausaban sa administrasyon ingon man ang sunod-sunod nga krisis nga miigo sa dakbayan.
