CEBU – Nakita ni Cebu City Second District Representative Eduardo “Edu” Rama Jr. ang panginahanglan sa pag-require sa mga tag-iya og residential buildings o structures nga magmentinar og portable fire extinguisher aron malikayan ang mga insidente sa sunog.
Matud ni Rama, nga gisugyot niya ang House Bill (HB) 6200, o “An Act Requiring Owners of Residential Building or Structures to Maintain Portable Fire Extinguishers,” nga nagmando sa matag tag-iya sa bisan unsang residential building o istruktura nga magmentinar sa mga portable fire extinguishers nga katumbas sa gidaghanon sa mga nagpuyo ug frequency sa pag-okupar, paggamit, mga ekipo nga anaa sa residential building, ingon man ang klasipikasyon sa peligro sa lugar, bisan unsa pa ang nasangkapan niini nga sistema ug kagamitan sa pagpanalipod sa sunog.
Gidugang sa magbabalaod nga ang mga portable fire extinguisher sayon gamiton ug nagkinahanglan og gamay nga pagbansay ug orientasyon sa pag-operate.
Gihatagan usab niya og gibug-aton nga ang mga sunog sa residential kanunay mahitabo sa mga lugar nga adunay daghang populasyon diin ang mga nagpuyo dili kaayo magmentinar sa mga portable fire extinguisher.
Ubos sa balaudnon, ang mga low-income households makadawat og subsidyo o suporta gikan sa ilang tagsa-tagsa ka local government units ug sa nasudnong kagamhanan sa pagpalit sa gikinahanglang portable fire extinguisher.
Dugang pa ni Rama nga ang budget alang sa inisyal nga pagpatuman sa maong Balaod i-charge sa BFP Modernization Trust Fund ubos sa Republic Act 11589 o ang “Bureau of Fire Protection Modernization Act.”
