CEBU CITY-Anaa na sa kustodiya sa kapulisan ang usa ka piniriso nga nakabenepisyo sa Good Conduct Time Allowance (GCTA) human kini boluntaryong misurender sa Brgy. Dakit, dakbayan sa Bogo, Cebu kagabii.
Mitahan ngadto sa kapulisan ang konbiktado nga si Jesus Ranoco Negro Jr., 50 anyos, nagpuyo sa nahisgutang lugar.
Usa si Negro sa mga pinirisong misurender human nga nanawagan si Presidente Rodrigo Duterte kagabii nga musurender ang dul-an 2,000 ka mga ‘convicted criminals’ kinsang naka-avail sa GCTA.
Matud ni Police Lieutenant Colonel Emelie Santos sa Bogo Police Station nga konbiktado si Negro og 8 counts of murder kung diin gipahamtangan kini og 30 ka tuig nga pagkapriso.
Nakagawas kini niadtong Agosto 9, 2018 human nga makapahimos sa GCTA nga gitanyag sa gobyerno.
Temporaryo kining natanggong sa Bogo Police Station karon. (GN)
