Wala gihatag sa pinaka unang corgi police dog sa China ang year-end bonus niini tungod sa iyahang pagka “bad dog”, human nga kanunay lamang kining matulog sa trabaho, ug mangihi pa sa iyang kaugalingong plato.
Giila ang maong iro nga si Fu Zai, kansa una nang misikat sa internet tungod sa ka inosente sa mga mata ug sa mga mugbo og tiil niini.
Gi-training si Zai niadtong Enero 2024 isip reserve explosives-detection operative ug gipasidunggan kini sa mga kapulisan ning nakalabayng semana tungod sa gihimo nga pagpaningkamot aron makapasar sa Level 4 assessment ug mga security tasks, diin gipresentar kaniya sa lamisa ang buwak, mga dulaan, ingon man lamiang snacks.
Apan naputol ang kalipay sa iro sa dihang gikuha sa police officer ang mga duwaan ug pagkaon nga bonus niini tungod matud pa sa iyang ka sipat, ug giingnan pa nga sa sunod dili na mag-tulog-tulog.
Ingon man nga nakadawat og mga pagbahad ang police officer gikan sa mga netizens nga padalhan og sinako nga snacks ug mga duwaan ang iro kung gani dili ibalik sa opisyal ang bonus niini.
