Cebu City– Gikompirmar ni Tayasan, Negros Oriental Mayor Susano Ruperto Jr. nga mitaliwan na ang Sangguniang Bayan member sa naasoy nga lungsod nga maoy unang kaso sa COVID-19 sa Central Visayas.
Sa ekslusibong pakighinabi sa Bombo Radyo Cebu kang Mayor Ruperto, giingon niini nga nadawat nila ang naasoy nga balita karon lang buntag kung diin ang naasoy nga konsehal mao ang patient no. 39.
Nasayran nga mi-attend sa Philippine Councilors League (PCL) ang naasoy nga konsehal sa Manila ug nagshopping kini sa Greenhills Shopping Center.
Sa dihang miabot kini sa Tayasan, sa wala pa kini makasinati og simtomas sa COVID-19, mitambong pa kini sa usa ka Recognition Ceremony sa usa ka elementary school sa naasoy nga lungsod kung diin nakigshake hands pa kini.
Matud si Mayor nga niadtong March 4 nakasinati kini og simtomas sa corona virus disease ug nagpacheck-up hangtud nga sa migawas ang resulta sa test nga positibo kini sa COVID-19 ug dali dayon nga gibalhin sa Siliman Medical Center kung diin didto kini mitaliwan.
Nasayran nga tungod kay duna kidney transplant ang naasoy nga pasyente, kini ang nakitang hinungdan mao nga wala nakaya sa lawas niini ang maong virus.
Sa karon sobra na sa 200 PUI’s ang naa sa Tayasan, NegOr lakip niini ang pamilya sa namatay nga official.
Nakaself quarantine na usab karon ang tanan nga mitambong sa naasoy nga recognition ceremony lakip na si Mayor Ruperto nga uban usab sa naasoy nga konsehal.
Nakatakda na usab nga i-cremate ang lawas sa naasoy nga SB member sa dili pa kini i-uli sa ilang lungsod.
