CEBU CITY-Muabot na dul-an 100 ang kinatibuk-ang kaso sa COVID-19 sa Central Visayas kini human nga nadugang ang 27 new cases.
Sa gipagawas nga report sa Department of Health Central Visayas, 211 samples ang gipaubos sa covid test sa Vicente Sotto Memorial Medical Center Sub-National Laboratory kung diin 184 ang nag negatibo.
Samtang ang 24 new cases usab ang gikan sa Sitio Zapatera, Barrio Luz, Cebu City nga karon naka lockdown, samtang ang 3 niini ang residente sa Lapu-lapu City nga karon duna nay 7 ka kaso nga corona virus.
Una na nga nakatala og 53 cases ang Cebu City ug gumikan sa nadugang gahapon misaka na kini sa 77 cases.
Subay niini, giingon sa Cebu City Gov’t nga lauman pang musaka ang mga positive cases gumikan sa mass testing apan ang naasoy nga barangay kung diin nagpuyo ang daghang nagpositibo, posibling dili na ipaubos pa sa covid test gumikan kay matud sa city health office, gikonsiderar na kini nila nga “infected area”.
Padayon usab nga gipanghimangnoan sa DOH-7 ang publiko nga musunod sa balaud karong ECQ ilabina ang social distancing aron dili mu-grabe pa ang covid-19 pandemic.
