CEBU CITY-Blangko pa ang kapulisan sa motibo sa kamatayon sa usa ka COVID-19 patient kinsang nilayat samtang nagpaalim sa Vicente Sotto Memorial Medical Center (VSMMC) sa dakbayan sa Sugbo.
Giila ang biktima nga si alyas “Juan,” 48 anyos, ug nagpuyo sa Tres de Abril St., Brgy. Labangon sa susamang dakbayan.
Matud sa hepe sa Abellana Police Station nga si Police Major Elisandro Quijano nga niresponde dayon ang iyang mga sakop human nakadawat og report apan wala sila nakaduol dayon sa patayng lawas gumikan sa kahimtang sa panglawas sa biktima sanglit naa kini corona virus.
Base sa ilang inisyal nga imbestigasyon, patay diha-diha dayon ang biktima human kini nilayat gikan sa ikatulong andana sa tambalanan. Pagduda usab ni Quijano nga posibleng nagtuo ang biktima nga dili na kini mu-maayo sa COVID-19 maong ni-ambak nalang kini.
Daling gipa-cremate sa mga hingtungdan ang patay’ng lawas sa biktima ug padayong nakig-alayon ang tambalanan ngadto sa kabanay sa biktima.
Dugang pa ni Quijano nga mo-kooperar ang kapulisan ngadto sa kadagkuan sa VSMMC aron subayon ang imbestigasyon sa gidangatan sa pasyente. | GN
