CEBU CITY — Gipaubos na sa isolation ang 135 ka mga residente sa Sitio Zapatera, Brgy. Barrio Luz, dakbayan sa Sugbo kinsang nataptan sa COVID-19.
Sa interview sa Bombo Radyo ngadto sa barangay secretary nga si Eldebrian Arañez, nagkanayon kini nga naandam na ang isolation area sa mga pasyente sa Barrio Luz National High School diin aduna kini mga higdaanan ug igo nga suplay sa tubig.
Gi-facilitate mismo sa Department of Health (DOH)-7 ang pagbalhin sa mga residente aron masiguro nga dili magkatag ang makamatay nga virus.
Gawas sa maong tunghaan, ibalhin usab ang pipila ka mga asymptomatic patients sa uban pang quarantine facilities sama lang sa SHS Bayanihan Cebu Field Center sa susamang dakbayan.
Dugang pa ni Arañez, nga mohatag ang City Government og mga panginahanglanon sa mga naka-quarantine sama lang sa pagkaon, ug uban pa.
Nanginahanglan karon ang barangay og dugang pang vitamins alang sa mga residente aron sa pakusgon ang panagang sa lawas.
